ئەزىز ئەيسا ئەلكۈن

شېئىرنى بىۋاستە ئاڭلاش : Sayragul.mp3

*مەن 2018-يىلى 1-ئاۋغۇست ئەنگىلىيىدىن قازاق ئېلىگە كەلگەن كۈنۈم قازاق قىزى سايراگۈلنىڭ ئەركىنلىككە ئېرىشكەنلىكىنى ئاڭلىغاندىن كېيىن ئۇشبۇ شېئىر قەھىرمان قازاق قىزى سايراگۈلگە ئاتاپ يازدىم.
خەلىقئارا قەلەمكەشلەر ئۇيغۇر مەركىزى باش كاتىپى ئەزىز ئەيسا ئەلكۈن.

سايرا گۈل، قازاق قىزى سايرا- سايراگۈل!
سايرا گۈل، ۋەتەن ئۈچۈن سايرا- سايراگۈل!
سايرا گۈل، ئادالەت دەپ سايرا- سايراگۈل،
سايرا گۈل، توختىما سەن، سايرا- سايراگۈل!

ئاۋازسىزنىڭ تىلى سەن، سايرا- سايراگۈل،
ئەركىلىك جەڭچىسى سەن، سايرا- سايراگۈل،
ھۆرلىكنىڭ ئەلچىسى سەن سايرا- سايراگۈل،
بۇركۈت بولۇپ پەرۋاز قىل، سايرا- سايراگۈل.

 

يوقالسۇن ئۇيغۇر-قازاق بېشىدىن كۈلپەت،
يوقالسۇن ئۇيغۇر ئېلىدە زۇلۇم بۇ رەت،
ياشىسۇن قان-قېرىنداش ئۇلۇسلار ئەبەد،
بۇلبۇل بول، ھۆر دۇنيادا سايرا- سايراگۈل!

يىلتىزداشمىز تاغۇ-دەريا، زېمىن تۇتاش،
قەلىبداشمىز تارىخ گۇۋاھ بىزگە يولباش،
تۈركمىز ئەسلى جەڭدە يېڭىلمەس سەبداش،
كۈيچىسى بول ۋەتەننىڭ، سايرا- سايراگۈل!

كۈلدى قەلبى جاسارەتتىن ئۇيغۇر بۈگۈن،
تىكتى كۆز دۇنيا ساڭا ھەۋەستە بۈگۈن،
بولدۇڭ مىلىيۇن خەلققە نىجاتكار بۈگۈن،
تۇغچىسى ئادالەتنىڭ سايرا- سايراگۈل!

تەشەككۇر سېنى تۇغقان ئۇلۇغ ئانىگە،
تەشەككۇر سېنى باققان ئۇلۇغ ئېلىڭگە،
تەشەككۇرلەر سايراگۈل جەسۇرلىقىڭگە،
ياڭرىغىن ھەق يولدا سەن، سايرا – سايراگۈل!

2018-يىلى 2-ئاۋغۇست، ئالمۇتا يېزىلدى.

_______________________________________

شېئ‍رنىڭ ئېنگىلىزچە تەرجىمىسىنى ئوقۇش:
www.azizisa.org/en/let-sayragul-sing