قۇش ئاۋازى

ئەزىز ئەيسا ئەلكۈن

 

قۇش ئاۋازى زەپ شوخ ئاۋاز،
ھەر كۈن بېغىم مېھمىنى.
تىنمايسەن سايراپ سەھەردە،
ئېيتساڭچۇ بىلەي تىلىڭنى؟

 

مەنمۇ سەندەك بولسام ئىدى،
خۇشئاۋاز سەھەردە سايراپ.
قوغلىۋەتسەم شۇ دەردىمنى،
يوقالسىدى مەندىن ئازاب!

 

شۇڭا سايرار بۇلبۇل لەرزان،
گۈل ئىشقىدا غەزەل ئېيتىپ.
كاككۇك مۇڭى تولا غەمكىن،
سېغىنىشنى يۈرەككە قېتىپ.

 

مۇھەببەتنىڭ مۇڭ ئاۋازى،
تەبىئەتنىڭ تەك كۈيچىسى.
سايرار بۇلبۇل مەشۇق ئۈچۈن،
ھەر شېخىدا گۈل غۇنچىسى.

 

ئاڭلىسام نەغمەڭنى يالغۇز،
قەلبىم تىنىچ دېڭىز گويا.
ئېسىمگە قايتىمەن شۇئان،
گۈزەل ئىكەن ئەسلى دۇنيا!

 

7- ئىيۇل 2016- يىلى لوندون

 



سەھىپىمىزدە پىكىر يازغاندا ئۇيغۇر تىلىنىڭ ئۆلچەملىك ئىملا قائىدىسىگە رىئايە قىلىشىڭىزنى تەۋىسىيە قىلىمىز !