ئەزىز ئەيسا ئەلكۈن

ئاڭلاش: Elkun_poem/Kechur_weten.mp3

شېئىرنى رابىيە داۋۇت ئوقۇدى

يۇلتۇزلۇق ئاسمىنىمدىن سېنى سورايمەن،
تاڭ سەھەر ھاۋاسىدىن سېنى پۇرايمەن،
ھەر كۈنى سېنى كۈيلەپ غەزەل توۋلايمەن،
كەچۈر مېنى، كەچۈر مېنى، كەچۈر ۋەتەن!

 
سېغىندىم ۋەتىنىم، ساڭا قىيالمىدىم …
ئېقىپ سۈيىڭدە، ئوتۇڭدا يانالمىدىم،
زار بولدۇم مېھرىڭگە، بىر كۈن قانالمىدىم،
كەچۈر مېنى، كەچۈر مېنى، كەچۈر ۋەتەن!

 
بۇلبۇل بولۇپ بېغىڭدا سايرىيالمىدىم،
ئاي بولۇپ كۆك ئاسمىنىڭدا ئايلىنالمىدىم،
ئاققاندا ياش كۆزۈڭنى سۈرۈتەلمىدىم،
كەچۈر مېنى، كەچۈر مېنى، كەچۈر ۋەتەن!

 
ئاتاجان، جىنازەڭنى كۆتۈرەلمىدىم،
ئاناجان، ھايات بارمۇ سەن، بىلەلمىدىم،
ئوت كۆيدى يۇرت باشىدا، ئۆچۈرەلمىدىم…
كەچۈر مېنى، كەچۈر مېنى، كەچۈر ۋەتەن!

 
ئۇيغۇرلۇق غورۇر يىغلار ئەلەمدىن بۈگۈن،
ئادىمىيلىك خىسلەتكە شەك چۇشتى بۈگۈن،
پاك قىزلىرىمىز نومۇستىن خار بولدى بۈگۈن،
كەچۈر مېنى، كەچۈر مېنى، كەچۈر ۋەتەن!

 
ئۇيغۇر بىز، ئەسلى ئوغۇزخان ئەۋلادىمىز،
بولساق ئوم، ھامان دۇشمەننى بىز يېڭىمىز،
كۈرەشسىز تەستۇر بىزنىڭ مەۋجۇدلىغىمىز،
كەچۈر مېنى، كەچۈر مېنى، كەچۈر ۋەتەن!

 
بىزدە باردۇر جاسارەت، دۈشمەنگە پۈكمەس،
سادىر ۋە نوزۇگۇمنىڭ روھلىرى يۈتمەس،
ياشنايدۇ ئۇيغۇر كۈرەشتە ئەسلا ئۆلمەس،
كەچۈر مېنى، كەچۈر مېنى، كەچۈر ۋەتەن!

 
زۇلمەت قامچىسى بېشىمىزنى يارغاندا،
ئۇيغۇرلۇق زىندانغا مەھكۇم بولغاندا،
نە قىلساق قىلايلى بىز، ئۆلۇم بۇ جاندا…
كەچۈر مېنى، كەچۈر مېنى، كەچۈر ۋەتەن!

 
31-ماي، 2018-يىلى، لوندوندا يېزىلدى.
مەنبە «ئەلكۈن» تورى