كۈز يامغۇرى
-
سەھىپە:Elkun she'irliri
باھا:0 دانە
19-12-2018
شېئىرنى ئاڭلاش: Kuz_yamghuri.mp3
شېئىرنى رابىيە داۋۇت ئوقۇدى
سەييارە چولپان كۆزدىن غايىب
ئۇلانماي تۈن كېچىسى تاڭغا
كۈز يوپۇرمىقى سەھەر بىلەن تەڭ چۈشكەن
قوزۇقلىرى سارغىيىپ -سارغىيىپ كەتكەن
دەرەخ شېخىدا يالغۇز كاككۇك
مۇڭغا پاتقان قونداقتا.
ئۇ باھارنى ئىزدەپ بالدۇر ئۇچمىغان
ئۇ بولالماي باھار كۈيچىسى
چۈنكى زەينەپتىن خەۋەر بولمىغان…
ئۇ ئۆزىنى ئۇنۇتقان
ئۇنىڭ پەيلىرى ئۇستىدىن دۈگىلەپ ئۆتەر
غەمگە لىق – لىق سۇغۇرۇلغان
كەچ كۈزنىڭ ئۈنچىسى.
گۈمبەزسىمان ئاسمانغا دەز كەتكەن
ئاق بۇلۇتلار رەڭگى قارايغان
كائىنات تامان ھازا ئاچقان
مۇھەببەت قەلئەسى چېقىلغان
گۇلدۇرقاراس …
گۇلدۇرقاراس …
ئەييۇھەنناس …
بۈگۈن ئۆمۇر دەتتىكامغا چۈشكەن
پىلسىرات كۆۋرۈكىدە سىم-سىم يامغۇر
ئاچچىق تەرلەر بىلەن ماماتقا قوشۇلۇپ
سىڭىپ كېتىشكە ئالدىرار
ئۇسسۇزلۇقى قانمايدىغان زېمىنغا!
15-ئۆكتەبىر، 2018-يىلى، لوندون.
elkun@azizisa.org