ئەزىز ئەيسا ئەلكۈن

كۆزۈمدە قېتىپ قالغان-

مېنى ئەسىرگە ئالغان-

بۇ ئاخشام ھالسىرايدۇ…

يۈرىكىمنى-

يېڭىدىن تۇغۇلغان-

تەلۋە تۇيغۇلىرىم تىلغايدۇ…

بۇ ئاخشام-

ئايۋالىقتا ئايپەرى-

مەرمەر دېڭىزىدا كۈيلەيدۇ…

مېنى ئۆزىگە چىللايدۇ….

مەن-

ساڭا يېقىن قىرغاقتىن-

ئۆزۈڭ كەلگۈچە سېنى كۈتمەستىن-

كۆلەڭگەڭنى تۇتۇۋېلىپ-

قولۋىقىم قىلىپ-

ئۈزۈۋالغۇم كېلىدۇ…

سېنى…

تەكلىماكاندا چاڭقىغان

ئاتەشتەك قەلبىمگە-

بېسىۋالغۇم-

تېڭىۋالغۇم-

قويۇۋالغۇم كېلىدۇ…

ئاي-

ئاسمان تەڭرىم سەن ئۈچۈن-

يۇلتۇزلارنى مونچاق كۆز قىلىپ

كۆكتە ياسىغانمۇ كەپە؟

دېڭىزدىكى مارجانلار-

سىرغىپ چۈشكەنمۇ سەندىن-

كۆز قىسىشىپ شۇڭغۇپ ئاقىدۇ

ئۇپۇقىڭنى يېرىپ ئۆتىدۇ-

سېھىرلىك بۇ كېچە!

ئاي-

يۇلتۇز بىلەن سەن مەشئەل-

قارا بۇلۇتقا كاراپ.

تەڭدىشىڭ يوق بۇ ئالەمدە-

سۈكۈتتە ئىتا’ئەتمەن

ئۇپۇق سۆيگەن كېچە-

قىلىدۇ ساڭا تاۋاپ…

ئاي-

ئايۋالىقتىكى تولۇن ئاي-

مەن سېنى تونۇۋالدىم-

بەلگە ساڭا قۇيۇۋالدىم…

كەلگەنمۇ سەن ئەسلى-

مېنىڭ ئاسمىنىمدىن-

ئايكۆلنىڭ-

ئايۋاغنىڭ-

كۇيباغنىڭ-

ئالتايدىن-

ئالتە شەھەرنىڭ كېچىسىدىن!

”ئاھ ئايىم …

مېنىڭ ئايىم سەن…“

دەپ قاتتىق توۋلىغۇم كېلىدۇ…

ئايۋالىقنىڭ ساھىلىدا

مەن غەۋۋاستا تۇغۇلغان-

سو’ئاللارغا-

جاۋاب ئالغۇم كېلىدۇ:

ئۇيغۇرنىڭ دېڭىزدىن ئۇزاق

شۇ ئاخشىمدا سەن كۆرگەن-

ئايكۆللۇكنى تونۇدۇڭمۇ؟

ئايدىڭكۆل قاراڭغۇمىكەن؟

ئاقسۇدا ئىتلار قاۋامدىكەن

يالقۇنتاغنىڭ ھارارىتىدىن –

يىلقا يېزىسىدا قۇزغۇنلار-

كېچە ئاسمىنىغا سەيلىسىگە چىققاندا –

مارالبېشىدىن غايىب –

ماراللار تارىمدا بوزلامدىكەن؟

ئايۋالىقتىكى تولۇن ئاي-

تونۇدۇڭمۇ سەپىرىڭدە بۈگۈن-

يۇلتۇزلارغا ئاشنا خەلقنى-

”مەن ئاق بايراق ئەمەس“ دېگەن

كوكتەڭرىدىن ئۇدۇم ئالغان-

ھەر كەچكىنىڭدە يولۇڭغا

ئاق پايانداز سالغان-

خانتەڭرىنى؟

قۇم دېڭىزى بىلەن-

تىلسىملار كانى بولغان

ئەمما ئەكسىڭنى ئۆز پېتى قاتۇرۇۋالغان

تەكلىماكاننى؟

كەچمىشىمنىڭ كوپلىگىدىن-

تېنەپ قالغان تۇيغۇلىرىم

ھەر تەرەپكە قاترايدۇ…

كۆڭۈل ئارامىمغا ھەسرەت قوشۇپ-

ئېلىپ كېتىشكە-

بالدۇر كەلگەن يورۇق ئىلاھى

ئايۋالىقتىكى تولۇن ئاينى-

مەغرىب تامان سۆرەيدۇ!

ھايات ئۆز يولىدا-

ئايۋالىقنىڭ كوچىسىدا-

ئەزان ئاۋازى كانايدا…

بامدات نامىزىغا چىللايدۇ…

ساھىلدىكى بەزمە خانىدا-

پەرەڭ مۇزىكىسى ياڭرايدۇ.

ئىتلارنىڭ قاۋاشلىرى-

توخۇلارنىڭ چىللاشلىرى…

دوقمۇشتىكى ئاشىق-مەشۇقنى

بۇ كوچىدىن قوغلايدۇ…

ئايۋالىقتىكى تولۇن ئاي-

مەن رەسسام بۇ ئاخشام…

يۈرىكىمگە سىزماقچى-

مەرمەر دېڭىزىدىكى كۆلەڭگەڭنى…

سىزىدى قەلىمىم زەنجىر-

باغلىۋەتتىم دېڭىزغا سېنى

سىياھلىرى بولدى قان

بويىۋەتتىم-

داغ قالغان يۈزۈڭنى!

ئاي-

ئەگەر كەتسەڭ بۇ نۆۋەت

سەندىن تىلىۋالاي

يېنىشىڭدا-

تەكلىماكاننى كۆرگەندە

خانتەڭرىنى سۆيگەندە

ساڭا ئاشىق قۇلۇڭدىن

پالاندى بۇ ئۇيغۇردىن-

ئايۋالىقتىن سالام ئەت!

ئاي-

ئايۋالىقتا مەن كۈتكەن-

ھايات شۇنچە رومانتىكمۇ؟

كۈلەلمىدىم…

ئۆزگىدە يوق كۈلكىگە-

زورلاپ كۈلۈشۈم مۇمكىنمۇ؟!

ئاھ ئايىم…

ئايۋالىقتا تولۇن ئاي-

ئارزۇيۇمدىن نە قالاي-

ئۆز مەيلىمدىن نە ياناي

بۇ كېچەڭدىن…

ئاي نۇرىڭدىن …

ئاي يۈزۈڭدىن ئايلىناي ….

ئايۋالىق، تۈركىيە

2013 – يىلى، 23 – ئاۋغۇست

بۇ شېئىر ئېنگىلىز ۋە تۈرۈك تىلىىرىغا تەجىمە قىلىندى:

ئېنگىلىزچە:

http://www.azizisa.org/en/the_full_moon_over_ayvalik

تۈرۈكچە:

http://www.azizisa.org/en/ayvalikin-uzerindeki-dolunay